الثلاثاء، 25 حزيران 2013

عن الزومبيز و الزمور


ما كنش المطلوب من اليافطة تنزل ولا حتى كان مطلوب تصرخ ولا مطلوب انك تبذل أي جهد.. كانت اليافطة بتقول " زمّر تضامنا مع الأسرى الأردنيين المضربين عن الطعام في السجون الصهيونية" و خلال ساعة و أنا حاملتها.. اللي زمروا يمكن 5. و أنا كنت متعمدة أحطها بوجه السيارات و أتأكد  انهم قادرين يشوفوها منيح.

انا كنت شايفيتهم زومبيز و قعدت بعقلي اعد كم جثة عم تمشي. مع كل الضجة اللي بعملوها الأهالي كل يوم من 55 يوم أكثر من 80 اعتصام بمختلف المناطق الحيوية في عمّان .. بأكبرضجة ممكنة الضجة اللي بالنسبة اللي أعذب موسيقى.. كنت مفكرتها الضجة بتوّجع و بتزعج من تخبيط على الطناجر لمسيرة سيارات بكل عمّان و تزمير و يافطات .. ما ضلش أي فكرة الا أهالي الأسرى عملوها لكن ازا على مستوى اليافطة اللي بتحكي للناس اللي بتمر من قدامهم انهم يزمروا ما زمروش كيف بنتوقع منهم انهم ينزلوا كمان أو ينزعجوا من الضجة. شاهين مرعي أخو الأسير منير مرعي بكتب يوميا على الفيسبوك بحرقة بحاول قدر الامكان انه يعّبر عن مدى الغضب اللي هو فيه لحتى وصل لنتيجة انه يضم الأحزاب و الحراكات الساكتة عن الموضوع لقائمة المفقودين كمان. يعني باختصار الزلمة صار يدوّر دوارة ع نتفة كرامة.

النظام الأردني ببساطة بعد 55 يوم لاضراب الأسرى الأردنين عن الطعام قرر يبعت سرسريته يتعرضوا لأهالي الأسرى اللي أغلبهم أمهات و كبار بالسن و فعلا بعت بلطجيته عند الديوان الملكي و عند دوار عبدون بالمرتين تهجموا على الأهالي و ما اعتقلوش أي حدا من السرسرية ولا حتى من باب يضحكوا علينا و اعتقلوا طبعا ابن عم الأسير منير مرعي .. بلال.. ضربوه و اعتقلوه.. يعني كنا بالحرية للأسرى و صرنا بالحرية لأهالي الأسرى كمان. و الدرك دخل ببسطاره و فش غل السرسرية.

بديش أحكي انه الأهالي تعبوا.. لانه بلا شك الوقفة تحت الشمس كل يوم مرتين ساعتين و انت تصرخ مش هينة على الصغير لحتى تكون هينة على الكبير. هداك اليوم عمتو للأسير منير مرعي صارت تبكي و تحكي مع صورة منير و قالتله " يما ما في دولة وراك انت ما الك الا الله" بعدها شرحتلي كيف انه امه توفت وهو بالسجن و انها خايفة تموت هي كمان قبل لتشوفه. طبعا أبو عبدالله البرغوثي دخل مدة المستشفى من كتر التعب و الارهاق و القهر و الجلطة اللي هو فيها و تعدي السرسرية عليه و أول ما طلع من المستشفى رجع على الاعتصامات.. أبو الأسير عبدالله البرغوثي بكل حرقة قلب مرة حكالهم" ولكم انا ابني شو عمل يعني.. ابني حط كندرته بثم "اسرائيل" أنا ابني عليه أكبر حكم بالتاريخ" .. تخيل يعني  ابنك مضرب عن الطعام صرله 55 يوم مش ماكل و عم بموت.. أي أنا لما أضرب عبدالله محادين المرة الثانية بعد اليوم التاسع بلشت أفقد عقلي.. انه كيف يالله ما ياكلش و صحته تاكل هوا.. هذا وهو بالسجن هون معتقل رأي.. كيف لو ب "اسرائيل " .. وبما انه الناس ما بتتعاطفش الا مع الناس اللي بتعرفها شخصي.. تعال أقولك شوي عن الأسرى.. كل أسير متلك متله عنده أحلام و عنده زوجة و بيت و أطفال و عنده أم و أب و هو مضرب عشان يعيش.. عشان بده يكمل حياة عشان ما بدوش يموش. و اشي ما عندوش أم و أب لأنهم ماتوا و هو بالسجن و كلهم "حطوا كندرتهم بثم اسرائيل" بكفيش هيك لحتى تتضامن معهم؟ طيّب انزل احكي مع أهاليهم بلكي عرفتهم أكتر أو بلاش شوف الصور.. شوف الأمهات و هم بهتفوا بحرقة و الدمعة بعينهم .. اليافطات ترى اهترت من الشمس و الطناجر اللي بندق فيها انخزقوا من كتر التطبيل و بيجي واحد بليد من جثث عمّان بقلك بس هم ليش يهتفوا "حرية من الله غضبن عنك عبدالله" طب يا روح امك بكرة بس تنحبس ب "اسرائيل" و بس تنمنع عن روحة الحمام و تنضرب من الصهاينة بالسجن و تضرب عن الطعام و امك تبلط بالشارع عشانك ساعيتها بنقعد ع قهوة ع رواق بنحلل بهتافاتها. ومن امتى اللي بعمل مقابلة مع سجّان صهيوني مهتم؟ طير بلا هبل. 

اليوم في اعتصام للأهالي من مجلس النواب عالساعة 5 لدوار الداخلية. طبعا مش متوقعة كتير ناس تنقح عليهم كرامتهم و ينزلوا ولا متوقع استعراض من مجلس النواب كمان اللي مرة حب يستعرض فيها و "طرد" السفير "الاسرائيلي"  اللي رايح أصلا على عزا أبوه و رجع. واه على سيرة دوار الداخلية هداك الاعتصام كنت واقفة مع الأهالي و الأمن بقلهم" كله ولا دوار الداخلية.. دوار الداخلية عمره ما حدا اعتصم عليه و ممنوع منعا باتا" للأمانة صحكت. متت ضحك. ولكو رجلينا اللي حفيت من الاعتصامات و أجسامنا اللي انضربت ع دوار الداخلية هذا كله بشهد على صدق كلامكم.

لا و باليوم اللي اعتصمنا مع الأهالي عالدوار الرابع ماكنش في عدد غير الاهالي مع انه قبل بيوم كان في معركة طاحنة و شرسة على الفيسبوك من مؤيديين عساف و معارضينه انا بصراحة بحضرش لا عرب أيدول ولا سخماط و ما عنديش مشكلة مع اللي بحضروه ولا شايفتها منطق يتحمّل فوق طاقته الشب ولا يتسخف ولا شايفة في داعي يدخلوه بعقدهم النفسية. بس والله العظيم ما قدرتش الا أصفن طيب اللي وزعوا وطنيات و هتوا على المتابعين البشر العاديين اللي على الأقل متصالحين مع ذاتهم و قلك لازم تحرير فلسطين و شو هالعهر و الخ وينهم؟؟؟ لا جد وينهم؟؟؟؟؟ يعني بتفت مراجل على الفيسبوك اعملك اشي عالأرض مشان الله أو اخرس.

أنا وصلت مرحلة أترجى زمروا. يا عمي زمروا. على الأقل بس تشوفوا أهالي الأسرى معتصمين زمروا. منتوا دايما بتزمروا عالطالعة و النازلة على أقل اشي بتزمروا.. زمروا مشان الله.. و عالأكيد هلأ رح يطلع عبقري  زمانه يقولي بس لا لا كيف بدك أتضامن وانا مش عارف شو تهمة كل واحد فيهم ب "اسرائيل" و يعملي فيها القانوني و الانساني و العالم قرية صغيرة و يالله كلنا نحب بعض و بصيرش العنف برجع بقلك تهمتهم زي ما حكى أبونا أبو الأسير عبدالله البرغوثي تهمتهم " حطوااااا كندرتهم بثمم اسرائيل" و اللي بقلك بس انتو كتير عاطفيين بالموضوع يأشرلي ع أي اشي منطقي بصير... و يحللي وين المنطق لما الأمن يتعاون مع السرسرية ما غيرهم المعروفين اللي صارت ستي بقبرها عارفة أساميهم لضرب الأهالي اللي بس بهتفوا..بس عادي مهاي البلد لسى اللي عذّب الشباب بأحادث الرابع على رأس عمله.. و حسين المجالي صار وزير داخلية فعادي يعني.
ويا دركي بدناش بطولات كايد مفلح عبيدات صرنا بس بدنا تضربش الأهالي و هم بهتفوا سلمية.


قررت من اليوم أكتب هون عن القرف اللي احنا فيه بما انه احنا الحرية واصلة معنا للفضاء و محجوبة المواقع فيالله نرجع للتدوين.



الأربعاء، 19 أيلول 2012

رسالة من عبدالله محادين "مجدَ فجر يتسامى"

طُلب مني "شلن" مقابل كيس ستُحفظ به- لأجل غير معلوم- ملابسي التي أرتدي، فكرت في من يأتي مجردا من النقود، نقلت "الدبلة" من يميني الى شمالي، احتجت أن أكون أقرب لمن أحب.
كنت ألبس بدلتي، فقد استيقظت بعد ليلة طويلة وأنا أظن أنني لن أتأخر عن دوامي أكثر من أربع ساعات، لكن قرار توقيفي خمسة عشر يوما بتهمة " تقويض نظام الحكم" جعلني أندم -فقط- على عدم ارتدائي لملابس أكثر راحة في طريقي الى سجنِ النزلاء فيه أكثر من الأسّرة.
"شو قضيتك؟ " في الأيام الأولى  تسمع هذا السؤال عشرات المرات، أحيانا ترغب أن تجيب  ب"قتل" أو "شروع" أو هتك عرض" علّ الصدمة تكون أخف فيكون النقاش بعدها أقصر، ثم تتذكر بأن للوطن حق على لسانك حتى لو كنت خلف القضبان.
لا أعرف الى متى سيحبسون جسدي و أجساد أحرار أتعلم منهم في كل دقيقة درسا في حب الوطن، أكذب على نفسي قبل أي أحد ان قلت أنني لا أكترث لموعد جسدي مع الحرية، فخارج الأسوار حبيبتي التي بغير عينيها لا أرتوي ووالدي اللذان يكفيني رضاهما ورفاقي الذين لعشقهم للوطن هم أغلي عندي من الدنيا. لا شك بأنني سأخرج مرفوع الرأس من هنا.

لا أعلم الكثير هنا لكنني موقن بأن الحراك الأردني والذي بدأ منذ عقود لن يفصّل على مقاس فاسد، لا يهم ماذا يقول "كبيرهم"، لن يتوّج الربيع الأردني بالانتخابات، ربيعنا سيتوّج بعودة الشركات، سيتوّج باسترداد البوتاس و الفوسفات، سيتوّج بألا يحبس شخص لرأيه، سيتوّج بألا نجوع و الحيتان يتقاسمون الأموال و الثروات، سيتوّج بأن يرجع الأردن سيدا حرا و بأن نرجع نحن الشعب مصدرا للسلطات.

لن يطلع الفجر الا بعد أحلك ساعات الليل، ربيعنا لم يكن يوما أقرب :) 

عبدالله محادين 
19-9-2012 
سجن الجويدة 

الثلاثاء، 24 تموز 2012

اشتقتلك أم العبد

اشتقتلك أم العبد..اشتقت تحكيلي اني أميرة الموّسى .. اشتقت ترني علي و انا بالشغل و تصرخي صراخ بموبايلك الجديد عشانك مش سامعة.. اشتقت أعلّمك عالموبايل كل مرة و تنسي و أحفظّك أرقامنا كلنا.. اشتقت لقوتك و هيبتك..اشتقت أقلك بدي أعلمك الكتابة و القراءة و تحكيلي قصة أبوي لما كان يجيب الورقة و القلم و يعلمك و هو راجع من المدرسة..  اشتقت لمسباتك..اشتقت بس أجيبلك صاحباتي  المش محجبات و تجحريهم عشان يحتشموا..اشتقت لما كنت لحالي ساكنة أحكي أجيب صاحباتي و تحكيلي يا ستي حنا ربع الصدورة مش الصحون و تخليني انّزل غدا بالصدر و تبهدليني ازا شفتي صحن نازل و ترني علي تحكيلي انت لحالك أه بس انت عن 10 و تضحكي و انت فخورة.. حلوة ضحكتك اشتقتلك .. اشتقت لما كنتي بالأعراس تناديني من أخر الدنيا و تقوليلي انه نحنا البدو بنقعد  زي اللوح و يا دوب نزقف و تكيفي علي بس ما أرضاش أرقص قدام الناس و أبتسم بس .. اشتقت تضربي بالباكورة و تعطي فيتو يتنفذ فورا.. اشتقت تحكيلي عن البلاد و تفرجينا مفاتيح بيوتك التنين بفلسطين اللي كنت حالفة ترجعي عركبك ازا رجعت فلسطين.. اشتقت تحكيلي انه مرج بني عامر كان النا كله و اللي بحكي غير هيك كذاب .. اشتقت لدعواتك الي بابن حلال زلمة  ..اشتقت لأسئلتك و لغيرتك علي و سؤالك الي لما اشتغلت ..كم شب يا ستي في بالشغل و بس حكيتلك في كتير قلتيلي فرجيهم العين الحمرا و اللي بحكي معك اشي غلط بالصرماي يا ستي. اشتقت للشاي بالحليب اللي بتعمليه و ابريقك اللي دايما عالغاز جنبك....اشتقت للشوكالاته و التمر اللي بتطلعيها من تحت تختك.. اشتقت تشغلي صوت الراديو و تضلك تسمعي قرآن و ان مرت الأخبار تلعني أبو أكبر حاكم ع أصغرهم .. اشتقت تفاجئيني بقوتك و انت لأخر يوم بتخيّطي و تفاصيلك الصغيرة و لما اكتشتفتي و انتي بتفرمي زنجبيل و حكيتي عييونك و حسيتيها تحسنت قمتي عملتي قطرة منه و صار دواكي.. اشتقت لكيس أدويتك.. اشتقت و احنا صغار لما كنتي تجيبلنا كيس الأشياء الزاكية من دكانة أبو العبد... ريحة جبل النزهة اختلفت بغيابك.. اشتقت أجي عالنزهة ألاقيكي برا تحت الزيتونة قاعدة ..اشتقت تحكيلنا عن قديش ما بتحبي "الطرز الحديث" ..اشتقت لجحرتك..اشتقت لشخصيتك اللي مش زي بقية النسوان .. اشتقت لقديش كنت تعملي كل اشي لحالك و ما عمرك حبيتي تكوني دور الضحية حتى بعز مرضتك.. اشتقت بس كنت تنامي عنا تنامي جنبي و ريحة المخدة تكون ريحة مرهمك النعنع..اشتقت ألعب بتجاعيدك و أعمل أشكال.. اشتقت لدقتك.. اشتقت لرمضان و انت صايمة و بتدعي لأبوي و بتسبي الغربة.. اشتقت للعيد أول يوم و انت لاميتنا...اشتقت للمزرعة و انت مبسوطة عليها و هي مفش فيها ولا شجرة... اشتقت تبهدليني كل صيف عشان بسمّر أكتر و بضلني تحت الشمس.. اشتقت تكوني فخورة فية و تحكيلي اني أخت رجال و اني غير عن البنات.. اشتقت تعلميني الأصول و تشتمي كل البنات المفرعات و كل بنات الجيل الحديث.. اشتقت لضحكتك و عيونك الزرق و عدتك الخياطة.. اشتقتلك و انتي بتمشطي شعرك بعد الحمام و بترجعي تلبسي الحجاب حتى لو فش زلام..اشتقت لنرفزتك عالممرضة بالمستشفى انه كيف بدها تلبسك اشي مفتوح من ورا و اشتقتلك و انت بتقاتلي .. اشتقتلك و انتي ماسكة ابن ابنك و بقمة سعادتك.. و اشتقت حتى لتميزك بين البنات والولاد و حبك للولاد أكتر ولما  تحكيلي بس انت يا جدة محسوبة منهم مثل الولاد.. اشتقت لتعيدة العيد الخمس ليرات ..اشتقت لمسبحتك و اشتقت لشعرك النبطي و مواويلك و خراريفك و حكمك و مواعظك.. اشتقت للبداوة كلها ..اشتقت لفلسطين.. اشتقت لروحك..اليوم كنت بغرفتك بروح و برجع و بتطلع ع صورنا اللي حطينالك ياهم ..اشتقت أجي أشكيلك من أي اشي تحكيلي "انتي عصبك قوي يا جدة" و تكتمي كل حرف بينا.. اشتقت لحنيتك .. اشتقت تحشيني أكل و تبهدليني بس أنحف..اشتقتلك حبيبتي.. بعرفش ازا سمعتيني بس انا كنت ماسكة ايديك و انت بموتي و قراتلك قران و حكيتلك أسرار و حكيتلك بحبك كتير.. بعرفش ازا حسيتي بس بستك و انت ميتة حكيتلك ترضي علي..  اشتقت تحكيلي عن عناد أبوي و انت فخورة فيه و عن قوته و رجولته.. و اشتقت تحكيلي عن أمي انها بنت العزيز عزيزة... أنا اشتقتلك بس حزينة و اللي بحكي انك كبيرة و خلص عمرك جاهل.. انت أم العبد .. انت ضايلة..انت المقاتلة.. 95 سنة بكل القوة و الجبروت و الحنية لاخر يوم خلتني أفكرك رح تضلك ع طول.. انا حزينة يا ستي و عندي حكي كتير.. انا دقة قديمة و بحبش الطرز الحديث متلك و عندي حكي كتير كتير.. انا متلك بس ترجع فلسطين بدي أرجع عركبي.. من وين أجيب قصص فلسطين هلا؟ انت فلسطيني ! اشتقت تحكيلي كيف كنت تركبي عالخيل و ترمحي بفلسطين .. اشتقت تحكيلي عن أكبر ذنب عملتيه لما شنقتي بسّة بعنف ..اه اشتقت ..اشتقتلك أم العبد.

الأحد، 8 تموز 2012

على الدوار الرابع من يستحق الحياة.. أكثر منا

ع الدوار الرابع في عيلة كبيرة.. هاي العيلة ما في بينهم رابطة الدم  بس ع الأكيد في رابطة الروح.. 5 أيام صرلهم لهلأ معتصمين ع الدوار و ما بدهم يتزحزحوا عشان ما فش اشي يخسروه.. وهم بضحكوا رح يحكولك " طب ما احنا بنام كل يوم في الشارع شو المشكلة لو نمنا ع الدوار؟! "


عريب انسانة حلمها تسكن بيت.. بعد ما صارت 18 سنة طلعت من قرى الأطفال و صارت تقص شعرها عالصفر عشان تقدر تنام بالشارع بدون ما حدا يتحركش فيها .. عريب بتحلم ببيت!! بس بيت و بتقلي " انا ما عشتش زي الناس لسى ما شفت اشي بالدنيا " .. اليوم اجا التلفزيون الأردني و قلهم " خلينا نركز على الايجابيات و ما تجيبو سيرة تزويج القاصرات " قامت عريب قالتلهم " انت بتحكو بس عن الايجابيات؟؟ طب انا كلي سلبيات "و بألم طردوا التلفزيون الأردني ..

مصطفى بشتغل بكازية و بنام كل يوم فيها بسألوا أصدقائه المصريين اللي بشتغلوا معه انت ليش ما بترّوح عالبيت و بجاوبهم دايما " معيش مصاري أعطي الحجة بس يصير معي برّوح" و قلي كمان انا مش معتصم عشاني انا معتصم عشان الأطفال اللي لسى بالمراكز ..

نور أرملة خريجة احد مراكز الأيتام أم أحمد.. أحمد مريض بالقلب و بده عناية خاصة و كمان بدهم سكن الهم .. نور خلّصت  الصف العاشر وزوجوها و هي صغيرة كتير.. بدها حياة حلوة لاحمد و راية و بقية ولادهاا، نور طلبت تشتغل  في الوزارة كأم وتربي صغارها كان شرط الوزارة  انها تربي نور صغار غير صغارها وينعطى صغارها لأم تانية  لتربيهم فرفضت و هلأ بدها شغل..

راجي اسمه الحقيقي رامي..الوزراة غيرت اسمه مجهول النسب ما معه يكمل دراسة .. جابتله الوزارة أسماء ناس وقالوله هدول أهلك ..تفضل دبر حالك.. راجي بقول انه رقمه الوطني ببدا بأرقام تختلف عن الباقي و بتميزه لانه مرة واحد بس شاف هويته تخوّت عليه وقله " يعني ابن حرام" ؟! 

تيما عمرها 15 سنة زوجوها و هي قاصر عشان يخلصوا منها ... تيما تزوجت واحد تربى معها بالمركز ... المفروض تيما تلعب مش تكون حامل هلأ..

خزاعلة .. شب بسيط  قلبه قلب طفل ... مرح و بضلو يحكي نكت وبقلك أحلى ذكرى بحياته كلها لما مرة نادوا عليه يا ابن الحرام راح جاب كل شباب المركز يضربوا اللي شتمه، هاي أحلى ذكرى بحياته كلها..تخيل؟


علاء لهلأ بتزكر كيف كانوا يحمّموهم بالعشرات مع بعض و هم مشلحين و بقلك قديش كان يحسوا حالهم غنم...


في وحدة من البنات  حكتلي عن قصة تحرش صارت معها  بالمركز وبنات تانيين اضطروا يشتغلو بنوادي ليلية عشان المصاري....بعد ال 18 لقوا حالهم بالشارع فجأة و ما لقوا غير هالطريق...

في شب حكالي عن اعتداء صار معه  و كان مستحي و هو بحكي بس و وشوشني و قلي "انا زلمة والله زلمة بس ما قدرتش احمي حالي" 

الشباب و هم بضحكوا قعدوا يتزكروا كل أنواع العصي اللي انضربوا فيها و قديش كانوا ينهانوا بالمراكز..و قالولي " المشرفين كانو يعصبوا كتير و يضربونا بسرعة ..نقوم نركض" حكولي عن طلال اللي لسى بالمركز و لسى بنضرب و هو من ذوي الاحتياجات الخاصة كمان..


كامل بحكيلي فريد مات و ما فش حدا سأل عنه عشان مالوش حدا.. فريد  كان المفروض يبدل دم و كان يترجاهم يطلع عالمستشفى يغيّر دمه... في يوم ما طلعوه ما فضيوله...  أخدوه متأخر و ما حدش زاره ..مات...عشان ما عندوش حدا بالدنيا.. دفنوه اولاد المركز لحالهم .. كامل بقول " فطيسة راح"

و أمانة بلاش توجعوا قلبهم  بزيادة بقصة الجزء المليان من الكاس.. هدول ناس ما عمرهم شافوا ايجابيات... هدول ناس ما شافوش يوم حلو واحد بالدنيا و ذنبهم انهم أيتام أو مجهولي النسب ... قالولي بالحرف " بيجو ناس بقولولنا ليش ما تشتغلوا طيب.. أية بالله عليكي شو نقولهم كيف بدنا نشتغل و احنا ما عنا اشي يأهلنا ما عنا شهادات متلكم.."

هدول بس كم واحد من 1800 حالة بالأردن..
 
هاي مطالبهم : 
 توظيف الايتام ....اعادة النظر في الرقم الوطني اللي بميزهم ببدا ب رقم 2000 و اعطاء الجنسية للخريجين من دور الرعاية من مجهولي النسب و غيره اللي لهلا ما عندهم أي اثبات، توفير التأمين الصحي لجميع الخريجات و الخريجين، دعم جمعية سكينة من قبل وزراة التنمية الاجتماعية و الجهات المعنية، فتح تحقيق في قضية وفاة فريد هاني اللويسي اللي مات ب 4-6 -2007، ان يكون دور صندوق الأمان فعال بشكل جذري و يشمل جميع فئات الايتام مش بس اللي معهم شهادة توجيهي، توفير المساكن للشباب و البنات بعد ال 18، يكون في رقابة من وزير التمية و مديرة الاسرة بموضع زواج بنات المؤسسات لانه الوزارة عم بتزوج بنات عمرهم 15 و 16 و كمان في بنات عم بزوجوهم لناس من جنسيات مختلفة و بتطلقوا بعد 6 أشهر....
 
هاي حقوق بسيطة، ادعمهم....



السبت، 18 شباط 2012

تموتش يا خضر

اليوم ال 57: قررت أكتبلك..  هيك عم بعملو العاجزين حالاتي! .. في كتير ناس عم تكتبلك و بتحاول تنشر موضوعك و أخر كل يوم بنصير نعد كم يوم صرلك مضرب و بنحكي عنك بطل...بلكي ازا كتبنا حسينا حالنا بشر لأنه بعملتك هاي انت غيّرت تعريف الانسانية يا خضر .. انت الانسان واحنا عم نتعلم منك .. اسفين يا خضر.

اليوم ال 58 : خضر .. تراب غزة و الضفة و رام الله وبيرزيت وجنين وحواري عرابة بسلمو عليك و بحكولك رفعت راسنا ... انت فلسطين يا خضر .. علّمهم شو يعني كرامة .. علّمهم شو يعني تكون فلسطيني ... علّمهم شو يعني تقهر سجانك.. بقلولك كمان رح ترجعلنا .. فلسطين محتاجيتك كتير.

اليوم ال59: خضر عدنان البطل لو أنا تمنيت أكون سوبرومن و أجي ع فلسطين و أنتشلك من السجن انت رح تكون سوبر مان و حترجعني ع جناح الحرية .. تصبح ع حرية. تموتش. 

اليوم ال61:
كمان يومين يا خضر بتصير مضرب عن الطعام ع قد عمر نكبتنا .. بحياتي ما كرهت الأكل قد هالفترة، كل لقمة ازا أكلتها ببلعها زي السم خجلا منك والله..مخزية يا خضر.. عندك بنوتة بدها تشوفك كل الشوق الك يا خضر..خضر انت مضرب عن الطعام و احنا كرهنا الحياة و كل يوم عم بكره عجزنا و الوضع برا خرى شقفة سفارة اسرائلية ما قدرنا نسكرها و ضربونا تخيل يا خضر؟ ..خضر عم بفكر أنزل عالحدود و انا عارفة اني مش رح اوصلك حتى بس لو متت بكون أشرفلي من هالشعور..خضر انت شبعان كرامة و عايش ع الكرامة مش ع الأكل بس برا في كتير مش شامين ريحتها لهل كرامة..اخ يا خضر لو تعرف قديش نحنا ضعاف، عم بنحرّر بلادنا العربية عشان نجيك ع فلسطين بس تموتش مشان الله.

اليوم ال 62:
خضر .. أبوك أضرب عن الطعام يا خضر!!..  اليوم أضربت معك صرلي بس يوم و تعبت فكيف انت ؟! بتعرف يا خضر اليوم قرأت انه مرتك حتجيب طفل ع هل دنيا.. نياله .. حسدته ع ابوه .. بده يطلع الصبي ابن  خضر عدنان !!! والله نياله .. فكرك يا خضر حد بتحرّك قبل لتموت؟ احنا هون الحكام العرب مش فاضينلك... عم بلزقو بالكراسي و بطفشو الشعب !!!! مش لو انك شاليط يمكن كان تحرّكو..


اليوم ال 63:
بقولو يا خضر جسمك عم بموت شوي شوي و خسرت فوق ال 30 كيلو !!! بقولو كمان احتمال يصير معك سكتة قلبية أو فشل عضوي كامل... بس روحك عالية .. عالية كتير يا خضر و واصلة لعنا للأردن..و  الكركي يا خضر رابط قضيته فيك والله .. فكرو مجنون بس معه حق كل الطرق تؤدي الى فلسطين و الك انت يا خضر..

اليوم ال 64 : خضر بتعرف شو صاير بمخبزك؟ صار يبيع كرامة مش بس خبز، صحيح اسم المستشفى اللي انت في "زيف" .. فعلا زيف يا خضر.. طيب اياك تقرأ شو بصير برا .. فش اشي شوية مفاوضات ع كمشة فتاوي.. المهم تموتش يا خضر

خضر انت عم بتقاتل عنا كلنا و انا قاعدة قدام لابتوب و قدامي مي انت مربوط بالسرير و مضرب.. تخيل الفرق يا خضر؟ ... انت مش بس عم بتقاتل ظروف الاعتقال الزفت و كمان قرار الاعتقال التعسفي الاداري تاع ولاد الكلب.. بيقعد الفلسطيني بالاسر 6 أشهر و فوق و هو مش فاهم شو تهمته.. تهمتكم كلها وحدة يا خضر  .. تهمة الكرامة و الشرف و هم مش قادرينلك ..  حتى سكوتك مخّوفهم يا خضر!!! مرعوبين من ارادتك.. قاتل يا خضر قاتل .. بس تموتش يا خضر بدك تاخد شهادة الماجستير و فلسطين بدها ياك.. تموتش..كل يوم عم عم بمر باضرابك انا عم بقرف من حالي و ضميري و كرامتي و شرفي و فلسطينيتي و عروبتي، خضر ازا انت متت عارف شو رح يصير؟؟؟؟ ولا اشي !!زي كل شهيد عم بموت .. بصيرش بعده اشي وبرجع أقرف من حالي وعروبتي ليوم الدين .. تموتش .. هذا جحيم اللي احنا في و احنا عم بنشوفك عم بتموت.. تموتش يا خضر.