الثلاثاء، 31 آب 2010

مش ضروري

مش ضروري ابدا كل طفل يكون "كيوت " و بريء و لا ضروري ابدا كل واحد بموت الله يرحمه و مش ضروري كل واحد بقرأ يكون بفهم و مش ضروري كل حلم يتحقق و مش ضروري يكون العدل انك تاخد حقك و مش ضروري بالمرة اللي ببكي يكون مظلوم و لا ضروري انه الأبيض للملائكة و الأسود قسوة ...مش ضروري الفلسفة معناتها ثقافة ولا ضروري العباطة تكون طيبة
مش ضروري المكتوب يبين من عنوانه ..مش ضروري الضحك بدون سبب قلة أدب ...و مش ضروري اللي بتعلم من كيسه يندم...و مش ضروري اللي بصلي يكون محترم و الملحد يكون قليل حيا
مش ضروري المتعلم يفهم اكتر من المش متعلم ..مش ضروري الحرية تعطيك سعادة ...
مش ضروري كل صديق يكون صدوق و لا ضروري كل عدو يكون لئيم ..مش ضروري كل واحد بتحبه بطلع بحبك و مش ضروري كل واحد بتحبه ابن حلال ..مش ضروري كل واحد يئزيك الله يعاقبه ..مش ضروري انك تكون نذل عشان توصل ... .مش ضروري الفتوة شجاعة
مش ضروري ابدا انك تكون كبير بالعمر عشان يكون عندك خبرة و مش ضروري تكون زغير عشان تلعب ..مش ضروري انك تنكت عشان تكون خفيف دم و مش ضروري بالمرة تشد على حالك عشان تكون جدي ...
مش ضروري اللي يروح يرجع و مش ضروري ابدا تكون الدنيا غابة و انتى عامل فيها الاسد
مش ضروري تكون اهبل و طيب عشان الناس تحزن عليك
مش ضروري ازا كنت مشكلجي يعني ازعر و مش ضروري ازا مسالم تكون أليف
مش بالضروري ازا دعيت الله يستجيب و لا ضروري ازا كفرت الله يسخطك
مش ضروري الأزرق للولد و مش ضروري الزهري للبنوتة ..
مش ضروري كل وطن يكون صالح للعيش ..
مش ضروري ازا كنت قدوة ما تغلط
و مش ضروري ازا كنت منيح تاخد نجمة و لا ضروري ازا مشاكس تتعاقب عجنب
مش ضرروي ازا درست تنجح و لا ضروري ازا ما درست ترسب
مش ضروري ازا ضحيت حدا يزئفلك ..
مش بالضروري الفقير مش مرتاح و لا بالضروري الغني مريش
مش بالضرورة الحقيقة تكون واضحة زي عين الشمس
و مش ضروري اللبيب يفهم من الاشارة ..و مش ضروري اللي بتعلم من كيسه يندم
و مش بالضرورة قلب الحب يكون احمر و لا بالضرورة يكون وجع بالقلب
مش بالضرورة ازا حوليك ناس كتير تكون متسلي و لا بالضرورة ازا وحيد تكون حزين
مش ضروري
مش ضروري كل واحد بدافع عن القضية بطل
مش ضروري
مش ضروري تكون اعمى عشان ما تشوفش
مش ضروري ازا مشلحة عاهرة و لا بالضرورة ازا محجبة كلها اخلاق
مش بالضرورة الغني حرامي و الفقير عباب الله
مش ضروري اللي عنده سيارة ما يحسش بالي نهرو رجليه
مش ضروري اللي بسكت عن الحق شيطان اخرس
مش ضروري كل واحد بدافع عن فلسطين يكون وطني
مش ضروري كل واحد مات و هو مبتسم رايح عالجنة
مش ضروري اللي ما بهتم يهتم و لا ضروري اللي بهتم يحمل فوء طاقته
ابدا مش ضروري

هناك تعليق واحد:

  1. معك حق
    عندنا قوالب جاهزة كثيرة و معظمها
    "غير دقيق"

    * ما الذي كان هو الدافع الأساس لهذا الإدراج ، سؤال خطر لي بنهاية قراءتي

    و "مش ضروري" نجاوبي طبعا ً بس سؤال
    هيك

    ردحذف