قرّب قرّب يا جدع

قرّب قرّب يا جدع
تعالا وشوف البدع
قرّب وشوف الالعوبان
بيمشي على الحبل ويرقّص التعبان
بينشف الميّه من الترعة
ويخليك وزير بسرعة
تشوفه قاعد على كرسيه
تقول ده مات وماعادش فيه
اللي يقربله بيحسنله
واللي يعانده بيذله
تشوف عليه العنكبوت
وبيفقس تحتيه الكتكوت
قرّب قرّب يا جدع
ولا تقولي بخت ولا ودع
يضرب بالرمل ويعمل عمل
ويعمل خطة ويقولك في أمل
يهد حارة من جوّه حارة
علشان قصر ولا عمارة
ويدخّل حبايبه بجدارة
من الزراعة للتجارة
بالفهلوة والشطارة
علشان يبيعوا الحقارة
ويحرم الصبية من الصبي
ويخلي عبقرينو أكبر غبي
قرّب قرّب يا جدع
يخلي الشبعان جعان
والآمن يصبح هربان
حتى النيل بقى عطشان
خلّى المعزة تجيب خرفان
والكلبة تولد انسان
والانسان يولد أحزان
حتى الصرخة بقت كتمان
والسمعان أصبح طرشان
إمام المسجد بقى فنان
بيغنيلو في كل أذان
قرّب قرّب يا جدع
قرّب وشوف العجايب
والحاضر يعلم الغايب
اجري يا صبية قرّبي يا وليّة
خير يا حورية!
ده حاوي يا سعدية
بصي يا سعدية شوية شوية
الحاوي طلع ابن حسنية
بيضحك على الناس بخطة خمسية
قرّب، لا تقول أبو زيد ولا الزير
بيعمل من الخفير وزير
أكيد عرفتوا (ابن) الخنزير

مواطن غلبان